De Ministère

D'Erausfuerderunge fir d'Lëtzebuerger Landwirtschaft

Nodeems et am 20. Joerhonnert zu enger Period vu Konzentratioun u Landwirtschaftsbetriber an enger Steigerung vun der Produktivitéit komm war, ass den Agrarsecteur zurzäit mat enger Rei Erausfuerderunge konfrontéiert, déi esou wichteg wéi dréngend sinn.

Haut ass d'Upassung vun de landwirtschaftleche Methoden a Praxissen un d'Ëmwelfuerderungen an un de Klimawandel absolutt noutwendeg, fir eng nohalteg Produktioun ze garantéieren. Dobäi mussen eng sëllege Strategien a Gestiounspläng agehale ginn, déi fir de Schutz vun den natierleche Ressourcen, vun der Biodiversitéit a vum Klima ausgeschafft goufen.

D'Produzente musse souwuel mat der internationaler an europäescher Konkurrenz op ugespaanten a volatille Wirtschaftsmäert mathalen, wéi och op d'Entwécklung vun den Erwaardungen a Gewunnechte vun de Konsumente reagéieren. Lëtzebuerg ass als klengt Land genau sou vun der Globaliséierung betraff wéi seng Nopeschlänner.

Wirtschafts- an Ëmweltkrise veronsécheren ëmmer nees d'Mäert a fuerdere vun de Produzenten ugepassten Aktiounen.

Fir op dës Tendenze kënnen ze reagéieren, kréien d'Bauere villfälteg Instrumenter zur Verfügung gestallt, wéi Innovatioun a Wëssenstransfer. De landwirtschaftleche Beruff mécht eng bemierkenswäert Entwécklung duerch, fir all dësen Erausfuerderunge gerecht ze ginn.

Missiounen an Attributioune vum Ministère

De Ministère fir Landwirtschaft, Ernärung a Wäibau huet follgend Kompetenzberäicher:

• Liewensmëttelproduktioun;
• Liewensmëttelsécherheet am Zesummenhang mat der Primärproduktioun;
• Entwécklung am ländleche Beräich;
• Konsumenteschutz.

De Ministère fir Landwirtschaft, Ernärung a Wäibau ass stänneg beméit déi gesellschaftlech Erwaardunge besser ze erfëllen an d'Landwirtschaft als wichtege Bestanddeel vun eiser Wirtschaft ze stäerken. D'Agrar- an Ernärungspolitik ziilt op d'Nohaltegkeet vun der landwirtschaftlecher Produktioun of a schléisst déi ganz Liewensmëttelkette bis hin zum Konsument mat an.

Déi national Agrarpolitik spigelt déi gemeinsam Agrarpolitik souwéi déi nohalteg Entwécklungsziler vun de Vereenten Natiounen erëm a berécksiichtegt déi verschidden national an europäesch Strategien an de Beräicher vum Klima, vun der Ëmwelt, vum Waasser a vun der Biodiversitéit. Se fërdert eng modern, multifunktional a virun allem nohalteg Landwirtschaft en zeechent sech duerch d'Ergänzung tëscht Kompetitivitéit, Schutz vun den natierleche Ressourcen an Déierewuel aus.

Gemeinsam Agrarpolitik

Déi gemeinsam Agrarpolitik (PAC) gouf 2022 reforméiert, woubäi de Schwéierpunkt op d'Leeschtung vun der Politik an d'Schafe vun Impakter um Terrain geluecht gouf. Déi ëffentlech Depensë vun der europäescher Politik sinn domat och méi cibléiert an op konkret Resultater ausgeluecht.

D'Ziler si méi éiergäizeg ginn an de Fokus huet sech erweidert, fir eng verantwortlech an nohalteg Landwirtschaft ze schafen, déi sech de villfältegen Erausfuerderunge stelle kann. Virun allem sinn d'Ëmweltziler méi ambitiéis ginn. Déi europäesch Strategie "vum Bauerenhaff direkt op den Teller" füügt nach weider konkret Ziler fir den Zäitraum iwwert 2030 eraus an.

Op nationalem Niveau, gëtt déi gemeinsam Agrarpolitik duerch en Nationale Strategieplang (PSN) transposéiert, deen op eng nohalteg Entwécklung am Agrarsecteur ausgeriicht ass, andeems en déi wirtschaftlech, ekologesch a sozial Ziler vum PAC ëmsetzt. Eng vun den Haaptprioritéiten ass et de landwirtschaftleche Produzente méi fair Revenuen ze garantéieren an d'Kompetitivitéit vun de Landwirtschaftsbetriber a vun der Agrar-Liewensmëttelindustrie ze stäerken. En anere Schwéierpunkt läit op der Generatiouns-Erneierung an de Landwirtschaftsbetriber, virun allem duerch d'Ënnerstëtzung vu Jongbaueren. Aner Ziler vum Lëtzebuerger Plang sinn d'Entwécklung vun der biologescher Landwirtschaft, d'Reduzéierung vum Asaz vu Pestiziden, vun den Zäregaser a vun Ammoniak, souwéi d'Promotioun vun der Kuelestoffbannung.

Et sief nach drop higewisen, dass d'Agrarpolitik e besonnesche Schwéierpunkt op d'ländlech Entwécklung an d'LEADER Initiativ leet, déi um nationalen Niveau duerch eng Strategie fir d'Duerfentwécklung ergänzt gëtt.

Méi gerecht an ekologesch Direktzuelungen

De PSN bitt eng Ënnerstëtzung fir Baueren, fir hinnen en dezente Revenu ze garantéieren, an d'Resilienz an d'Kompetitivitéit vum Gesamtsecteur ze stäerken, dëst am Respekt vun enger nohalteger Entwécklung. Lëtzebuerg huet och eng Pauschalbezuelung fir Jongbaueren agefouert. Iwwert e System vu gekoppelte Bäihëllefen, huet Lëtzebuerg ausserdeem eng spezifesch Ënnerstëtzung fir d'Secteure vum Rëndfleesch a vum Uebst a Geméis ausgeschafft.

Eng vun de groussen Neierunge vum PAC ass d'Aféierung vun Öko-Reegelungen um Niveau vum éischte Pilier, déi Praxisse zugonschte vum Klima- an Ëmweltschutz finanziell wierdegen.

Déi verschidde Systemer vun de Bäihëllefen si gekoppelt un d'Anhale vun enger Rei u Mindeststandarden an ekologesche Grondbedéngungen. Säit der aktueller Period, ginn se nach duerch eng sozial Konditionalitéit verstäerkt an ergänzt, a beinhalten e Katalog u Sanctioune beim Net-Anhale vun de Bedéngungen. D'Ausbezuele vun den Hëllefen ass domat direkt un d'Anhale vu Mindeststandarde gebonnen a garantéiert esou eng nohalteg Produktioun ënnert gudde soziale Bedéngungen.

Ënnerstëtzung vun de grousse Prioritéite vun der ländlecher Entwécklung zu Lëtzebuerg

D'Moossnamen am Kader vun der ländlecher Entwécklung vum zweete Pilier betreffen d'Erausfuerderunge fir Lëtzebuerg am Kontext vun der Kompetitivitéit an der Moderniséierung vum Agrarsecteur, dem Klimawandel, der Reduzéierung vun Zäregaser, dem Ëmweltschutz, der Biodiversitéit an dem Déierewuel. De pluriannuelle Kader vun dëse Moossnamen ass am Aklang mam Joressystem vun den Öko-Reegelungen.

Dës Moossnamen si villfälteg an ergänzen déi vum éischte Pilier. Fir d'Zilvirgabe fir den Agrarsecteur am Beräich vun der Reduzéierung vun den Emissiounen (Zäregas an Ammoniak) kënnen z'erreechen, huet de Ministère spezifesch Ënnerstëtzungen agefouert fir déi fräiwëlleg Reduzéierung vum Véibestand a vun den agesaten Zousazmëttel am Agrarsecteur ze fërderen.

Well d'Erausfuerderunge villfälteg an éiergäizeg sinn, ënnerstëtzt de Ministère verschidden Instrumenter fir de Wëssenstransfer, déi sech un d'Bauere riichten. Am Vierdergrond steet dobäi d'Berodung zur Ëmsetzung vun neie landwirtschaftleche Praxissen, déi souwuel d'Ziler am Beräich vum Ëmweltschutz wéi och d'Besoinen u Produktivitéit berécksiichtegen. Och d'Innovatioun gëtt gefërdert fir dass nei Techniken a Produktiounsmethoden entwéckelt ginn.